Fusquenlla apela ao  Valedor do Pobo e ao Ministerio Medio Ambiente


Foron innumerabeis as denuncias que o colectivo Fusquenlla presentou ante o concello de Pontedeume e ante a Conselleria de Política Territorial , CPTOPV, sen obter unha resposta satisfactoria ás súas demandas. Cabe sinalar entre estas:

Que se fixesen efectivas as ordes de paralización ditadas sobre as obras que Lagares, S.L. e a empresa Construeume efectuan en diversos puntos de Pontedeume (Caldagueiro e Nogueiorsa)
Que se decretase a paralización do edificio situado á beira de Correos por non se axustar ás Normas Subsidiarias de Pontedeume
Que a CPTOPV puxese en coñecemento da fiscalía o incumprimento por parte do concello de Pontedeume do regulamento de disciplina urbanística ao permitir ao promotor ampliar unha obra declarada ilegal en lugar de facer efectiva a orde de paralización.
Que a CPTOPV revogase as competencias urbanísticas delegadas no concello de Pontedeume.
Que se están a modificar viais públicos por parte dunha empresa construtora amais de construir en solo non urbano.
Que se está a construir en zona rústica de protección costeira.
Que sexan mostrados os expedientes solicitados polo Colectivo Fusquenlla, dereito recollido no Real Decreto 772/1999

O comportamento irregular do concello de Pontedeume denota unha clara aposta pola defensa dos intereses privados de certas promotoras e construtoras en contra do ben público que representa o noso patrimonio. Os construtores, co beneplácito dos rexedores locais e nun claro desafío ás institucións públicas, non reparan en medios e instan aos compradores a ocupar as vivendas sobre as que pesan decretos de ilegalidade. Pretenden deste xeito facer máis difícil a actuación da Administración á hora de facer respeitar a lexislación.

Consideramos que o silencio dos organismos públicos, neste caso a consellería de Política Territorial,  é unha manifestación do alto grao de desidia que embarga aos que deberian velar polo cumprimento da legalidade, descansando esta responsabilidade nos colectivos ecolóxicos e asociacións veciñais. Demandamos do goberno galego unha actuación que vaia máis aló das coñecidas declaracións de defensa do valor paisaxistico das nosas costas, e que esta implicación non atenda á cor das equipas de goberno dos distintos concellos.

Por todo o anterior este colectivo decidíu presentar ante o Valedor do Pobo unha queixa baseada na indefensión provocada nos cidadáns pola inhibición e pasividade das administracións, local e autonómica, permitindo que se demore a resolución dun problema que acarrea enormes prexuizos imposibeis de reparar no futuro. Asemade establecese un agravio comparativo ao crear dúas categorias de cidadáns: os que deben acatar as leis e os que están exentos do seu cumprimento.

Paralelamente infórmase ao Ministerio de Medio Ambiente (Demarcación de Costas) da situación ilegal de certas construcións situadas en Nogueirosa dentro da zona de protección costeira, unha das cales (propiedade do xestores de Construeume) xa goza do correspondente informe da CPTOPV instando á súa paralización por vulnerar a legalidade en non poucos aspectos.

Todo o anterior non é incompatíbel con outras medidas que Fusquenlla poida levar a cabo para conseguir que en Pontedeume se instaure a legalidade perdida nun proceso que está a asolar a meirande parte da costa deste país.